Xullo, mes da sega

Aquí van algúns refráns do mes de Xullo, tamén chamado "mes de San Xacobe", "mes de San Iago" ou "mes da sega". Xa o di o refrán: "San Iago manda o pan (velaí o da sega), San Migueliño manda o viño, San Francisco manda a landre e San Andrés o touciño. Outros: "En Xullo onde o mozo: ou no río ou no pozo". "O que non aproveita Xullo para se bañar, é que tén medo do río e do mar". "Baña en Xullo o teu gando, despois de haber sesteado". "Do trinta de Xullo en diante, calor asfixiante". "En Santiago arden os montes e secan as fontes". "En Xullo normal seca todo manantial". "Principia asando e acaba tostando". "Xullo quente, millo valente". "Por moito que queira ser, en Xullo pouco ha de chover". "Se en Xullo non vén treboada, haberá mala anada". "En Xullo e Agosto troupelear, que este é o tempo do liño mazar". En xullo arder e patacas coller. Xullo andado, millo arrendado. Pola Santa Mariña, rapa a añiña. Pola Santa Mariña, pousa a sacha e colle a fouciña. Cando canta a ran, vén vindo o verán. Polo San Bartolo (24 ag.), a boa fiadeira comeza a súa tea; a máis lixeira, pola Madalena (22 xullo). Polo Santiago, cegoñas e polos a xeirar polos agros.